Məhkumların Təhsil Hüququ: Ombudsman Hansı Yeniliyi Təklif Edir?
Yetkinlik yaşına çatmayan məhkumların ali təhsil alması üçün xüsusi bir mexanizmin hazırlanması təklif edilir.
“Operativ Məlumat Mərkəzi-OMM” xəbər verir ki, bu təkliflə Azərbaycanın insan hüquqları üzrə müvəkkili (Ombudsman) Səbinə Əliyeva Milli Məclisin plenar iclasında 2025-ci ildəki fəaliyyəti ilə bağlı məruzəsini təqdim edərkən çıxış edib.
Onun sözlərinə görə, xarici ölkələrin müsbət təcrübəsi nəzərə alınmaqla, yetkinlik yaşına çatmayan, habelə xüsusi ictimai təhlükə törətməyən və az ağır cinayət törətmiş məhkumların ali təhsil müəssisələrinə qəbul imtahanlarında iştirak edə bilmələri vacibdir.
Bu mexanizmin işlənib hazırlanması həmin şəxslərin təhsil hüququnun təmini baxımından olduqca əhəmiyyətlidir.
S.Əliyeva həmçinin əlavə edib ki, ötən il Ombudsman tərəfindən şəxslərin öz iradəsi ilə tərk edə bilmədiyi yerlərə müntəzəm qaydada başçəkmələr davam etdirilib.
Bu yoxlamalar və daxil olmuş müraciətlər əsasında insan hüquq və azadlıqlarının daha səmərəli müdafiəsi məqsədilə səlahiyyətli dövlət qurumlarına müvafiq təklif və tövsiyələr ünvanlanıb.
Hərbi Xidmətə Möhlət Hüququnda Hansı Dəyişiklik Gözlənilir?
Bununla bərabər, Ombudsman "Hərbi vəzifə və hərbi xidmət haqqında" qanunun 21-ci maddəsinə (Təhsili davam etdirmək üçün çağırışa möhlət verilməsi) dəyişiklik edilməsini təklif edir. Təklifə əsasən, qiyabi təhsilalma formasında təhsil alan şəxslərə münasibətdə də çağırışa möhlət verilməsi nəzərdə tutulur.
