İngiltərə Premyer Liqasında mövsümün ən böyük sürprizlərindən birinə imza atan "Aston Villa", heyətini gücləndirmək yolunda ciddi addım atıb.
"Operativ Məlumat Mərkəzi-OMM" “TEAM Talk” nəşrinə istinadən xəbər verir ki, Unai Emerinin rəhbərlik etdiyi komanda, uzun müddətdir “Tottenhem”in hədəfində olan "Parma"nın gənc ulduzu Mandela Keita üçün transfer yarışına qoşulub.
23 yaşlı yarımmüdafiəçi bu mövsüm İtaliya çempionatında nümayiş etdirdiyi performansla Avropa nəhənglərinin diqqətini çəkib. Müdafiəyə meyilli və mərkəz yarımmüdafiəçisi mövqelərində çıxış edən Keita, bu mövsüm 22 matça start heyətində başlayıb.
Gənc futbolçunun parlaq çıxışı onun Belçika milli komandası ilə Dünya Kubokuna yollanmaq şanslarını da əhəmiyyətli dərəcədə artırıb.
İtaliya mediası "Parma"nın futbolçu üçün tələb etdiyi minimum məbləği də açıqlayıb. Keitanı heyətinə qatmaq istəyən klublar ən azı 25 milyon avro (21.8 milyon funt-sterlinq) ödəməli olacaqlar.
Hazırda Premyer Liqa cədvəlində 3-cü pillədə qərarlaşan "Aston Villa", gələn mövsüm Çempionlar Liqasında iştirak etmək şansını demək olar ki, təmin edib. Bu amil, Keitanın seçimində həlledici rol oynaya bilər. Digər tərəfdən, "Tottenhem"in bu mövsüm liqada çətin günlər keçirməsi və aşağı pillələrdə qalması London klubunun transfer şanslarını zəiflədir.
Buna baxmayaraq, "Spurs" hələ ötən ilin dekabr ayından etibarən Keitanı yaxından izləyir və mütəmadi olaraq skautlarını İtaliyaya göndərir. Klub rəhbərliyi illərdir izlədikləri hədəfi rəqibinə qapdırmamaq üçün yaxın zamanda rəsmi təkliflə çıxış edə bilər.
