Milli Məclisin İnsan hüquqları komitəsinin sədri Zahid Oruc bildirib ki, tətil dövründə Şəhidlər Xiyabanında baş verən əcnəbilərin qeyri-etik davranışları və illərdir bəzi siyasi qüvvələrin milli yaddaş məkanlarını öz siyasi tribunasına çevirməsi “Şəhidlər xiyabanları haqqında” xüsusi qanunun qəbulunu zəruri edir.
"Operativ Məlumat Mərkəzi-OMM"-in xəbərinə görə, deputat parlamentin 2025-ci il payız sessiyasının ilk plenar iclasında çıxışı zamanı qeyd edib ki, yeni qanun şəhidlərin xatirəsinin qorunmasını, ictimai davranış qaydalarını, memarlıq və abadlıq tələblərini, ziyarət mədəniyyətini və protokolları, eyni zamanda elektron bələdçilik və təhlükəsizlik tədbirlərini əhatə edə bilər.
Deputat bildirib ki, Şəhidlər Xiyabanı kimi milli yaddaş məkanlarının siyasi mübarizəyə alət edilməsi yalnız etik deyil, həm də milli təhlükəsizlik məsələsidir.
"Yeni qanun bu məkanların toxunulmazlığını təmin etməklə, milli həmrəyliyi qorumaq və etik dəyərlərin üzərində vəhdəti gücləndirmək məqsədini daşıyır. “Şəhidlər xiyabanları haqqında” qanun qəbul olunsa, xalqın ruhən birləşdiyi məkanlar siyasi parçalanmaya alət edilməz və milli-mənəvi yaddaşın canlı saxlanmasına xidmət edər".
Aidə Qurbanlı
