Pakistanın baş naziri Şahbaz Şərif Kahramanmaraşda "əsrin fəlakəti" olaraq xarakterizə edilən zəlzələlərdən sonra həmrəylik nümayiş etdirmək üçün Türkiyəyə gedəcək.
"Operativ Məlumat Mərkəzi - OMM" xarici mediaya istinadən məlumatına görə, sabah Ankarada olması planlaşdırılan Şərifin Rəcəb Tayyib Ərdoğanla görüşü gözlənilir.
Kahramanmaraşda baş verən zəlzələlərin çox dağıdıcı olduğunu dilə gətirən Şərif, "Türkiyə tarix boyu zəlzələ, sel və çətin anlarda bir ailə kimi Pakistanın yanında olduğu kimi, bu kədər anında da Türkiyənin yanındayıq" – deyib.
Şərif, Pakistan Hərbi Dəniz Qüvvələrinin komandanı admiral Məhəmməd Əmcəd Xan Niazinin Türkiyəyə böyük miqdarda yardım ləvazimatları göndərilməsi üçün gəmi təklif etdiyini bildirib və Pakistan Hərbi Hava Qüvvələri və Pakistan Beynəlxalq Hava Yollarının (PİA) Türkiyəyə personal daşımaqla məşğul olduğunu vurğulayıb.
