BMT-nin Baş katibi Antonio Quterreş Azərbaycan Prezidenti İlham Əliyevə Müstəqillik Günü ilə bağlı təbrik məktubu ünvanlayıb. Məktubda milli günlərin ölkələrin keçdiyi inkişaf yolunu, beynəlxalq aləmə verdiyi töhfələri və gələcək hədəfləri dəyərləndirmək üçün əhəmiyyətli bir fürsət olduğu vurğulanıb.
Antonio Quterreş qeyd edib ki, hazırda dünya müharibələrin dayandırılması, iqlim böhranı, bərabərsizliklərin aradan qaldırılması və texnologiyaların məsuliyyətlə idarə olunması kimi ciddi sınaqlarla qarşı-qarşıyadır. Baş katib bu qlobal çağırışların həlli üçün aşağıdakı məqamların vacibliyini diqqətə çatdırıb:
- Sülh və təhlükəsizliyin təmin edilməsi;
- Dayanıqlı İnkişaf Məqsədlərinin irəlilədilməsi;
- İnsan hüquqlarının qorunması;
- Yenilənmiş əməkdaşlıq və çoxtərəfli tərəfdaşlığa sadiqlik.
Məktubun sonunda BMT rəhbəri Azərbaycan xalqına ən xoş arzularını çatdırıb və Prezident İlham Əliyevə ehtiramını ifadə edib.
