Milli Məclisin sədri Sahibə Qafarova Rusiya Federasiyasına işgüzar səfəri zamanı Azərbaycanın Sankt-Peterburq şəhərindəki Baş Konsulluğunda olub. Milli Məclisin Mətbuat və ictimaiyyətlə əlaqələr şöbəsindən verilən məlumata görə, parlament nümayəndə heyəti əvvəlcə Ümummilli Lider Heydər Əliyevin Baş Konsulluğun binasında yerləşən büstünü ziyarət edərək önünə gül dəstələri düzüblər.
Spiker Baş Konsulluğun kollektivi ilə görüşüb və quruma Ulu Öndər Heydər Əliyevin həyat və fəaliyyətini əks etdirən kitablar hədiyyə edib.
Daha sonra Baş Konsulluqda 28 May – Müstəqillik Gününə həsr olunmuş rəsmi qəbul təşkil edilib. Tədbirdə aşağıdakı məqamlar vurğulanıb:
- Azərbaycanın dövlətçilik tarixində Müstəqillik Gününün tarixi əhəmiyyəti;
- Ölkəmizin keçdiyi inkişaf yolu və müstəqillik illərində qazanılan uğurlar;
- Prezident İlham Əliyevin rəhbərliyi ilə əldə olunan nailiyyətlər.
Qonaqlara Azərbaycanın inkişafından bəhs edən videoçarxlar təqdim olunub. Tədbir tanınmış incəsənət xadimlərinin iştirakı ilə keçirilən konsert proqramı ilə yekunlaşıb.
