Dünya futbolunun canlı əfsanəsi Kriştianu Ronaldu karyerası ilə bağlı yeni və maraqlı bir yol ayrıcındadır.
"Operativ Məlumat Mərkəzi-OMM" insayder Ben Ceykobsa istinadən xəbər verir ki, 40 yaşlı hücumçu 2027-ci ildə Səudiyyə Ərəbistanının "Al-Nassr" klubu ilə müqaviləsi başa çatdıqdan sonra peşəkar futboldan gedə bilər.
Futzal üzrə Azərbaycan millisi Danimarka ilə ikinci yoldaşlıq oyununa çıxacaq
Hazırda Ronaldunun qarşısında duran əsas hədəf 1000 qol həddinə çatmaqdır. Statistik göstəricilər isə onun hələ də formada olduğunu təsdiqləyir:
- Karyerası ərzində vurduğu qolların sayı: 960;
- "Al-Nassr" forması ilə çıxdığı 125 matçda vurduğu qollar: 110;
- Səudiyyə klubu ilə müqavilə müddəti: 2027-ci ilə qədər.
Ronaldu "A Bola" nəşrinə verdiyi açıqlamada ailəsinin ona futbolu buraxmağı tövsiyə etdiyini, lakin özünü hələ də həm klubu, həm də milli komandası üçün faydalı hiss etdiyini bildirib.
Lakin idman dünyası artıq ona alternativ sahələr təklif etməyə başlayıb.
"Manchester United" və "Villarreal"ın sabiq hücumçusu Cüzeppe Rossi "Goal.com" saytına verdiyi müsahibədə Ronaldunu Hollivudda, xüsusilə də məşhur "Joker" obrazında gördüyünü qeyd edib. Hətta fransalı keçmiş futbolçu Emmanuel Petit onun gələcəkdə "Oscar" mükafatı ala biləcəyini də istisna etmir.
Mütəxəssislərin fikrincə, Ronaldunun cərimə meydançasından "Warner Bros" pavilyonlarına keçidi, onun hər hansı Avropa klubuna transferindən daha məntiqli görünür. Çünki o, artıq sadəcə bir idmançı deyil, qlobal bir brend və françayzadır. "Al-Nassr" rəhbərliyinin ulduz futbolçunu komandada saxlamaq üçün ona klubun 15 faizlik səhmlərini təklif etməyə hazır olduğu da gəzən şayiələr arasındadır.
Ronaldunun əsas narahatlığı karyerasını bitirmək deyil, diqqət mərkəzindən düşməkdir. İstər Pirs Morqana verdiyi qalmaqallı müsahibə, istərsə də meydandakı hər bir hərəkəti ilə o, hər zaman gündəmdə qalmağı bacarır. Görünən odur ki, portuqaliyalı ulduzun böyük futboldan gedişi də onun karyerası kimi rekordlarla və səs-küylə müşayiət olunacaq.
