Azərbaycanın təbii qaz ehtiyatları həm ölkənin daxili tələbatını, həm də tərəfdaş dövlətlərin ehtiyaclarını ən azı növbəti yüz il ərzində tam təmin etmək gücündədir. Bu barədə Prezident İlham Əliyev 31-ci "Baku Energy Forum"un rəsmi açılış mərasimindəki çıxışında bildirib.
Dövlət başçısı qeyd edib ki, Azərbaycan Xəzər dənizinin şərq sahillərindəki tərəfdaş ölkələr üçün mühüm tranzit qovşağı rolunu oynayır: "Mərkəzi Asiyadan hasil olunan neft Azərbaycan ərazisindən keçərək beynəlxalq bazarlara çıxarılır. Ümid edirəm ki, yaxın gələcəkdə təbii qazla bağlı da eyni sözləri deyə biləcəyik".
Prezident ölkənin emal sənayesindəki nailiyyətlərinə də toxunub:
- SOCAR-ın neft emalı gücü 30 milyon tondan artıqdır.
- "Italiana Petroli"nin satın alınması ilə Aralıq dənizi hövzəsindəki emal gücü 13 milyon tondan 23 milyon tona çatdırılıb.
İlham Əliyev vurğulayıb ki, Azərbaycan yalnız xam neft və qaz deyil, həm də neft məhsulları, elektrik enerjisi və neft-kimya məhsulları ixrac edir. Bərpaolunan enerji sahəsinə yatırılan sərmayələrin vacibliyini qeyd edən dövlət başçısı əlavə edib: "Ölkələr sahib olduqları neft ehtiyatlarına əsasən deyil, həmin resurslardan əldə olunan gəlirləri necə idarə etdiklərinə və bərpaolunan enerjiyə necə sərmayə yatırdıqlarına görə qiymətləndirilməlidirlər".
Sonda Prezident bərpaolunan enerji sektorunda investorlar üçün 90-cı illərin əvvəllərində neft sənayesində tətbiq olunan əlverişli əməkdaşlıq mühitinin yaradıldığını diqqətə çatdırıb.
