İran tərəfindən İsrail ərazisinə növbəti raket zərbələri endirilib və İsrail Müdafiə Ordusu bu hücumu rəsmən qeydə alıb.
“Operativ Məlumat Mərkəzi-OMM” xəbər verir ki, ordunun mətbuat xidməti yaydığı bəyanatda İrandan ölkə ərazisinə doğru buraxılmış raketlərin aşkar edildiyini təsdiqləyib. Hazırda hava hücumundan müdafiə sistemləri raketlərin havada zərərsizləşdirilməsi üzərində intensiv işləyir.
Təhlükəsizlik tədbirləri çərçivəsində müvafiq rayon sakinlərinin mobil telefonlarına təcili xəbərdarlıqlar göndərilib və əhalidən dərhal təhlükəsiz sığınacaqlara keçmələri tələb olunub.
Xatırladaq ki, ABŞ və İsrail 28 fevralda İrana qarşı hərbi əməliyyatlara başlayıb. Həyata keçirilən əməliyyatlar nəticəsində İranın ali rəhbəri ayətullah Əli Xamenei və bir sıra yüksək vəzifəli şəxslər öldürülüb.
Bu hadisələrdən dərhal sonra İran cavab tədbiri olaraq İsraillə yanaşı, ABŞ və müttəfiqlərinin hərbi bazalarının yerləşdiyi Səudiyyə Ərəbistanı, Qətər, Birləşmiş Ərəb Əmirlikləri, Oman, Bəhreyn, İraq və Kiprdə müəyyən etdiyi strateji hədəflərə zərbələr endirməyə başlayıb.
