Ermənistan və Azərbaycan rəsmiləri Yunanıstanda keçiriləcək beynəlxalq forumda eyni paneldə iştirak edəcəklər.
"Operativ Məlumat Mərkəzi-OMM" xəbər verir ki, bu barədə Təhlükəsizlik Şurasının mətbuat xidməti məlumat yayıb.
Bildirilib ki, Ermənistan Təhlükəsizlik Şurasının katibi Armen Qriqoryan Yunanıstanda təşkil olunacaq iqtisadi forum çərçivəsində Azərbaycan Prezidentinin köməkçisi Hikmət Hacıyevlə birgə panel müzakirəsində iştirak edəcək.
Qeyd olunub ki, forum aprelin 22-də Delfi şəhərində keçiriləcək. Müzakirənin mövzusu “Strateji ayırıcı xətlər: Avropanın Şərq qonşuluğunda münaqişələrin idarə olunması və dayanıqlığın artırılması” olacaq.
Məlumata görə, paneldə Yunanıstan Baş nazirinin milli təhlükəsizlik üzrə müşaviri Tanos Dokos və Moldova Prezidentinin milli təhlükəsizlik üzrə köməkçisi Stanislav Sekryeru də iştirak edəcək.
