Bakı-Sumqayıt marşrutu üzrə hərəkət edən sürət qatarına daş ataraq təhlükə yaradan daha 4 yeniyetmə müəyyən edilib.
Bu barədə “Operativ Məlumat Mərkəzi-OMM”-ə Daxili İşlər Nazirliyindən məlumat verilib.
Məlumata görə, qatar hərəkətdə olarkən şüşəsinin zədələnməsi ilə bağlı polisə şikayət daxil olduqdan dərhal sonra Dəmiryolu Nəqliyyatında Polis İdarəsi tərəfindən müvafiq tədbirlər görülüb. Nəticədə, əməli törətməkdə şübhəli bilinən yeniyetmələr müəyyən edilərək valideynləri ilə birlikdə polis orqanına dəvət olunublar.
Hüquq-mühafizə orqanlarının əməkdaşları tərəfindən yeniyetmələrlə profilaktik söhbətlər aparılıb və bu hərəkətlərin yarada biləcəyi ağır fəsadlar onların diqqətinə çatdırılıb.
Xatırladaq ki, qatara daş atılması həm sərnişinlərin, həm də qatar heyətinin həyatına ciddi təhlükə yaradır. Eyni zamanda, bu cür insidentlər qrafikdə gecikmələrə səbəb olaraq vətəndaşların mənzil başına vaxtında çatmasına mane olur.
