İspaniyanın “Barselona” klubu “Mançester Siti”nin yarımmüdafiəçisi Rodri Ernandesin transferi ilə bağlı yeni addım atmağa hazırlaşır.
“Operativ Məlumat Mərkəzi – OMM” xəbər verir ki, tanınmış insayder Fabritsio Romanonun sosial şəbəkə hesabında paylaşdığı məlumata görə, kataloniyalılar yaxın günlərdə İngiltərə klubuna üçüncü rəsmi təkliflərini göndərəcəklər.
Daha əvvəl “Mançester Siti” rəhbərliyi Rodri üçün edilən 50 və 60 milyon avroluq təklifləri rədd edib.
Hazırda tərəflər arasında danışıqlar təxminən 70 milyon avro ətrafında davam edir. Bununla belə, İngiltərə klubu 30 yaşlı futbolçunun transferi üçün 80 milyon avro tələb edir.
Məlumata görə, “Barselona” rəhbərliyi danışıqlar prosesində tələsmədən və təmkinli şəkildə hərəkət etməyə üstünlük verir.
Qeyd edək ki, Rodri ötən mövsüm bütün turnirlər daxil olmaqla 33 qarşılaşmada meydana çıxıb və 2 qola imza atıb.
