Bakı Ağır Cinayətlər Məhkəməsində Cinayət Məcəlləsinin 233-4.2.3 və 273.4-cü maddələri ilə ittiham olunan İmamverdiyev Etibar Oktay oğlunun cinayət işi üzrə məhkəmə prosesi başa çatıb. Məhkəmənin hökmü ilə təqsirləndirilən şəxs 6 il müddətinə azadlıqdan məhrum edilib.
İstintaqla müəyyən edilib ki, Etibar İmamverdiyev transmilli şəbəkə vasitəsilə Azərbaycan ərazisində qanunsuz beynəlxalq telekommunikasiya xidmətləri təşkil edib. Dövlət Təhlükəsizliyi Xidmətinin (DTX) apardığı araşdırmalar nəticəsində onun beynəlxalq axtarışa verildiyi, xarici ölkədə saxlanıldığı və hüquqi prosedurlardan sonra Azərbaycana ekstradisiya olunduğu məlum olub.
İşin detallarına görə, E.İmamverdiyev digər şəxslərlə əlbir olaraq xüsusi avadanlıqlar vasitəsilə ölkənin telekommunikasiya şəbəkəsinə qanunsuz qoşulub. O, mobil operatorların SIM kartlarından istifadə edərək xaricdən daxil olan zəngləri internet üzərindən yerli şəbəkəyə yönləndirib və bu yolla dövlət nəzarətindən kənar rabitə xidməti yaradıb. Həmçinin, o, dövlət əhəmiyyətli infrastrukturun kompüter sisteminə müdaxilə edərək məlumatları dəyişdirib.
Məhkəmə iclasında qeyd olunub ki, təqsirləndirilən şəxsin əməlləri nəticəsində dövlət təhlükəsizliyinə təhdid yaranıb və Azərbaycan Nəqliyyat və Kommunikasiya Holdinqinin (AZCON) “AzInTelecom” şirkətinə külli miqdarda maddi ziyan vurulub.
