Bakıda keçirilən batut gimnastikası üzrə Dünya Kubokunda kişi və qadınların fərdi yarışlarının ardından AGF Trophy-2023-ün qalibləri müəyyənləşib.
"Operativ Məlumat Mərkəzi-OMM"-in məlumatına görə, Azərbaycan Gimnastika Federasiyası braziliyalı idmançılara xüsusi mükafat verib.
Kişilərdən Rayan Dutra, qadınlardan isə Alise Qomes bu ada layiq görülüblər. Onlara mükafatı gənclər və idman nazirinin müavini Mariana Vasileva və Azərbaycan Gimnastika Federasiyasının İcra Komitəsinin üzvü Rauf Əliyev təqdim ediblər.
Qeyd edək ki, Milli Gimnastika Arenasında təşkil edilən Dünya Kubokunda Alise Qomes qadınların yarışında dördüncü yeri tutubsa, onun həmyerlisi Rayan Dutra kişilərin mübarizəsində finala yüksələ bilməyib.
