Rusiyanın xarici işlər naziri Sergey Lavrov bildirib ki, ABŞ prezidenti Donald Tramp və onun administrasiyası Ukrayna böhranının bütün tərəflərin qanuni milli maraqları nəzərə alınmaqla həll olunmalı olduğunu başa düşür.
"Operativ Məlumat Mərkəzi-OMM" xəbər verir ki, Lavrov bu barədə Moskva Dövlət Beynəlxalq Münasibətlər İnstitutunda (MDBMİ) çıxışı zamanı deyib.
O, qeyd edib ki, Tramp administrasiyası fərqli olaraq “təkcə dinləməyə yox, həm də eşitməyə hazırdır”.
Lavrov deyib ki, ABŞ artıq Ukraynanın NATO-ya daxil olması məsələsinin bağlanmalı olduğunu anlayır, həmçinin rus dilinin, mədəniyyətinin və Ukrayna Pravoslav Kilsəsinin təqibinə qarşı da mövqe sərgiləməyə başlayıb.
Nazir əlavə edib ki, Qərbin Ukraynaya milyardlarla dollar sərmayə yatırması, onu tam itaətkar və NATO yönlü bir rejimə çevirmək cəhdi böhranın əsas səbəblərindəndir.
Lavrov, Ukraynada rus dilinə qoyulan qadağaların dünyada analoqu olmadığını vurğulayıb və bu yanaşmanın Avropa dəyərləri ilə ziddiyyət təşkil etdiyini bildirib.
