İsrail ordusunun Qəzza zolağında apardığı hərbi əməliyyatlar zamanı daha bir media üzvü həlak olub.
"Operativ Məlumat Mərkəzi-OMM" xarici KİV-ə istinadən xəbər verir ki, Xan Yunis şəhərinə endirilən zərbə nəticəsində “Al Jazeera“ telekanalının operatoru ölüb, müxbiri isə yaralanıb.
Məlumata görə, jurnalist Vael Daduh və operator Samir Abudaka Xan Yunisdəki məktəbdən reportaj hazırlayarkən şəhər İsrailin hücumuna məruz qalıb.
Əlindən, qolundan, çiynindən və qarın nahiyəsindən yaralanan müxbir dərhal xəstəxanaya aparılıb. Hücumla bağlı açıqlama verən Vael Daduh yoldaşını xilas etmək istəsə də bunu bacarmadıqlarını deyib.
“Təcili yardım maşınına mindik, lakin mən onlardan geriyə qayıtmalarını istədim, çünki Samir hələ də orada idi, qışqırıb köməyə çağırırdı. Tibb işçiləri isə mənə dərhal getməli olduğumuzu və hadisə bölgəsinə başqa təcili yardım briqadası göndərəcəklərini bildirdilər”, – deyə yaralı jurnalist qeyd edib.
Əl-Cəzirə telekanalı ölümlə nəticələnən hava hücumunu pisləyərək jurnalistlərin və onların ailələrinin sistematik şəkildə hədəfə alındığına dair açıqlama yayıb. Telekanal baş verənlərə görə İsrail hökumətinin məsuliyyət daşıdığını bildirib.
Samir Abudakanın ölümü ilə Qəzzada hərbi əməliyyatlar zamanı həlak olan fələstinli media üzvlərinin sayı 59-a yüksəlib. Dekabrın 15-nə olan statistikaya əsasən 2 aydan çoxdur davam edən İsrail-Həmas müharibəsi nəticəsində azı 66 jurnalist həlak olub.