Xəzər Rayon Polis İdarəsinin əməkdaşları tərəfindən narkotik vasitə və psixotrop maddələrin qanunsuz dövriyyəsinə qarşı növbəti əməliyyat tədbiri həyata keçirilib.
Daxili İşlər Nazirliyinin Mətbuat xidmətindən "Operativ Məlumat Mərkəzi-OMM"-ə verilən məlumata görə, əməliyyat zamanı şübhəli bilinən paytaxt sakinləri — 33 yaşlı Haqverdi Əhmədli, 35 yaşlı Mahir Əhmədov və onun qardaşı, 26 yaşlı Elxan Əhmədov saxlanılıblar.
Baxış zamanı onlardan ümumilikdə 10 kiloqram 896 qram çəkidə, tərkibinə psixotrop maddələr əlavə edilmiş marixuana aşkar edilərək götürülüb.
İlkin araşdırmalar nəticəsində məlum olub ki, saxlanılan şəxslər narkotik vasitələri şəxsiyyəti istintaqla araşdırılan İran vətəndaşından satmaq məqsədi ilə əldə ediblər.
Faktla bağlı cinayət işi başlanılıb, zəruri istintaq tədbirləri davam etdirilir.
