Bakı şəhərinin Lökbatan-Güzdək avtomobil yolunun 2.2-ci kilometrliyində bərpa tədbirləri həyata keçirilir. Azərbaycan Avtomobil Yolları Dövlət Agentliyindən (AAYDA) verilən məlumata görə, hazırda ərazidə gediş-gəlişin fasiləsizliyini təmin etmək üçün müvəqqəti alternativ yolun tikintisi davam etdirilir.
Aparılan işlər çərçivəsində sel sularının yararsız hala saldığı mövcud suötürücü qurğunun sökülməsi nəzərdə tutulub. Bununla yanaşı, ərazidə yeni körpünün layihələndirilməsi prosesi də paralel şəkildə icra olunur.
Qeyd edək ki, sözügedən tikinti-bərpa işləri ölkə Prezidentinin müvafiq sərəncamına əsasən yerinə yetirilir.
