"İnter Mayami" klubunun kapitanı Lionel Messi, komandanın "İndependente del Valle" ilə planlaşdırılan yoldaşlıq matçının ləğv edilməsindən sonra azarkeşlərinə müraciət edib.
"Operativ Məlumat Mərkəzi-OMM" xəbər verir ki, Puerto-Rikoda keçirilməsi nəzərdə tutulan bu qarşılaşma, ABŞ təmsilçisinin mövsümöncəsi hazırlıq mərhələsinin son sınağı olmalı idi.
Dünya çempionu ötən həftəsonu Ekvadorun "Barselona" klubu ilə keçirilən görüşdə zədə alıb. Həmin matçda qol vurmağı bacaran argentinalı ulduz, hiss etdiyi ağrılar səbəbindən ikinci hissədə meydanı tərk etmək məcburiyyətində qalıb. Bu zədə Puerto-Rikodakı azarkeşlərin Messi həyəcanını müvəqqəti olaraq təxirə salıb.
Məsələ ilə bağlı tərəfdarlarına səslənən 36 yaşlı hücumçu, oyunun ləğv edilmə səbəblərinə aydınlıq gətirib:
"Ekvadordakı son qarşılaşmada müəyyən narahatlıq hiss etdiyim üçün oyunu erkən bitirməli oldum. Klub və təşkilatçılarla məsləhətləşərək, risk etməmək adına bu matçın dayandırılmasına qərar verdik. Ümid edirəm ki, oyunu yaxın gələcəkdə yenidən planlaşdırıb sizinlə görüşə biləcəyik. Dəstəyinizə görə minnətdaram."
Ulduz futbolçu həmçinin biletlərin artıq satıldığını bildiyini və 21 fevralda başlayacaq MLS mövsümünə qədər Puerto-Riko xalqı ilə görüşmək üçün əlindən gələni edəcəyini vurğulayıb.
Xavyer Maskeranonun baş məşqçiliyi altında ötən mövsüm möhtəşəm çıxış edən "İnter Mayami", finalda "Vankuver Uaytkeps"ə qalib gələrək tarixində ilk dəfə MLS Kubokunun sahibi olub. Komanda yeni mövsümə son çempion titulunu qorumaq hədəfi ilə start verir.
Qeyd edək ki, bu, Messinin ilk belə hadisəsi deyil. Daha əvvəl Honkonqdakı mövsümöncəsi turda da zədə səbəbindən meydandan kənarda qalan ulduz futbolçuya görə, klub rəhbərliyi azarkeşlərin bilet pullarının bir hissəsini geri qaytarmalı olmuşdu.
