İran və ABŞ uranın zənginləşdirilməsinə moratorium tətbiqi ilə bağlı danışıqlar aparır və onun müddəti 12 il ola bilər.
"Operativ Məlumat Mərkəzi-OMM" xəbər verir ki, bu barədə "Axios" portalı mənbələrə istinadən məlumat yayıb.
Məlumata görə, İran moratoriumun 5 il, ABŞ isə 20 il olmasını təklif edib.
Portalın digər mənbəsi isə bildirib ki, moratorium 15 il qüvvədə qala bilər.
ABŞ həmçinin belə bir müddəanın əlavə edilməsini istəyir ki, İran tərəfindən pozuntu baş verərsə, moratoriumun müddəti uzadılsın.
Qeyd olunub ki, moratorium başa çatdıqdan sonra Vaşinqton Tehrana uranın zənginləşdirilməsini 3,67%-ə qədər bərpa etməyə icazə verməyə hazırdır. Bu səviyyə 2015-ci ildə imzalanmış "Joint Comprehensive Plan of Action" (JCPOA) çərçivəsində nəzərdə tutulmuşdu.
Adı açıqlanmayan ABŞ rəsmisinin sözlərinə görə, tərəflər həmçinin İranın yeraltı nüvə obyektlərini istismar etməməsini nəzərdə tutan maddəni də müzakirə edirlər. Bundan əlavə, İran BMT tərəfindən qəfil yoxlamalar da daxil olmaqla, müfəttişlərin obyektlərinə girişinə icazə verilməsi ilə bağlı öhdəlik götürə bilər.
Müzakirə olunan digər məsələ isə yüksək zənginləşdirilmiş uranın ölkədən çıxarılmasıdır. Mənbənin iddiasına görə, radioaktiv materiallar ABŞ-yə daşına bilər.
Məlumat üçün bildirək ki, 2015-ci ildə İran, Böyük Britaniya, Almaniya, Çin, Rusiya, ABŞ və Fransa "Joint Comprehensive Plan of Action" sazişini imzalayaraq 2002-ci ildə Qərbin Tehranın nüvə silahı hazırlaması ilə bağlı ittihamları nəticəsində yaranmış böhrana son qoymuşdu.
Lakin 2018-ci ildə ABŞ prezidenti Donald Tramp sazişdən çıxdığını elan edərək İrana qarşı bütün sanksiyaları bərpa etdi. Buna cavab olaraq İran 2020-ci ildə JCPOA üzrə öhdəliklərini azaltdığını bildirdi, o cümlədən uranı 3,67%-dən yüksək səviyyədə zənginləşdirməyə və ölkə daxilində 300 kq-dan çox radioaktiv material saxlamağa başladı.
Bundan başqa, İran "International Atomic Energy Agency" müfəttişlərinin ölkənin nüvə obyektlərinə çıxışını məhdudlaşdırdı.
