Azərbaycan Mərkəzi Bankı (AMB) və İsveçrə Milli Bankı (İMB) arasında əməkdaşlığın perspektivləri müzakirə edilib.

"Operativ Məlumat Mərkəzi-OMM" xəbər verir ki, bunu AMB-nin sədri Taleh Kazımov "X" sosial şəbəkəsindəki hesabında bildirib.

"Tacikistana işgüzar səfər çərçivəsində İMB-nin sədri Tomas Cordan ilə ikitərəfli görüşümüz oldu. Görüşdə iki ölkənin mərkəzi bankları arasında əməkdaşlığın cari vəziyyəti və perspektivləri ilə bağlı müzakirələr apardıq. T.Cordana qurumlarımız arasında əməkdaşlığın daha da möhkəmləndirilməsinə və Seçki Qrupu ölkələri arasında sıx tərəfdaşlıq əlaqələrinin qurulmasının təşviqinə verdiyi mühüm töhfəyə görə təşəkkürümüzü bildirdik. İMB-də sədrlik fəaliyyətini başa çatdıran cənab Cordana yeni fəaliyyətində uğurlar arzu etdik", - deyə o qeyd edib.

Bu gün Hesablama Palatasının sədri Vüqar Gülməmmədovun rəhbərliyi ilə növbəti Kollegiya iclası keçirilib.

"Operativ Məlumat Mərkəzi-OMM" Palataya istinadən xəbər verir ki, iclasda “Milli Məclis tərəfindən dövlət vəsaitinin və əmlakının istifadəsinin hüquqi aktlara uyğunluğunun auditinin nəticələrinə dair Auditor hesabatı” və “Naxçıvan Muxtar Respublikası Ali Məclisi və tabeli qurumu tərəfindən dövlət vəsaitinin və digər dövlət əmlakının istifadəsinin auditinin nəticələrinə dair Auditor hesabatı” müzakirə edilərək təsdiqlənib.

İclasda Naxçıvan Muxtar Respublikasının İcbari Tibbi Sığorta üzrə Dövlət Agentliyi tərəfindən dövlət vəsaitinin istifadəsinin və idarə olunmasının auditinə, İşsizlikdən sığorta fondunun büdcəsinin gəlirlərinin və xərclərinin icrasının auditinə, Naxçıvan Muxtar Respublikası Səhiyyə Nazirliyi və strukturuna daxil olmayan tabeliyindəki qurumlar tərəfindən (seçmə qaydada) dövlət vəsaitinin və digər dövlət əmlakının, istifadəsinin və idarə edilməsinin auditinə dair kənar dövlət maliyyə nəzarəti tədbirlərinin proqramlarının təsdiq edilməsi barədə qərarlar qəbul edilib.

Eyni zamanda, kollegiya iclasında Hesablama Palatasında keyfiyyətin idarəedilməsi siyasətinin yeni İSSAİ 140-a uyğunlaşdırılması (SoAQM layihəsi çərçivəsində) qərara alınıb.

İclasda Çexiyanın paytaxtı Praqada keçirilən “İqlim Skaneri üzrə EUROSAİ regional təlimi” mövzusunda iştirakla bağlı Hesabat müzakirə edilib. Qiymətləndirmə alətinin əsas aspektləri barədə məlumat verən məruzəçi bildirib ki, alət üzrə aparılacaq qiymətləndirmə nəticələri bütün ölkələr üzrə ümumiləşdirilərək Bakıda keçiriləcək COP-29 tədbirində açıqlanacaq.

Sonda Hesablama Palatasının 2024-cü ilin İş Planında əks olunmuş kənar dövlət maliyyə nəzarəti tədbirlərinin icra vəziyyəti müzakirə edilib, sədr tərəfindən İş Planına təkliflərin təqdim edilməsi üçün auditorlara tapşırıqlar verilib.

Azərbaycan və Özbəkistanın mərkəzi bankları arasında Anlaşma Memorandumu imzalanıb.

"Operativ Məlumat Mərkəzi-OMM" xəbər verir ki, bunu Azərbaycan Mərkəzi Bankının (AMB) sədri Taleh Kazımov "X" sosial şəbəkəsindəki hesabında bildirib.

"Tacikistana baş tutan işgüzar səfər çərçivəsində Özbəkistan Mərkəzi Bankının sədri Mamarizo Nurmuratovla görüşdən məmnun olduq. Görüş zamanı rəhbərlik etdiyimiz qurumlar arasında tərəfdaşlığın genişləndirilməsinə, təcrübə və məlumat mübadiləsinin aparılmasına, eləcə də ikitərəfli səfərlərin təşkilinə xidmət edəcək əməkdaşlığa dair Anlaşma Memorandumu imzaladıq. İnanırıq ki, Memorandum hər iki mərkəzi bank arasında əməkdaşlığın möhkəmləndirilməsinə öz töhfəsini verəcək", - deyə o qeyd edib.

Nazirlər Kabineti dəmiryol nəqliyyatında hərəkətin təşkilində birbaşa iştirak edən şəxslərin vəzifələrinin siyahısının, eləcə də onların geyim formasının, fərqlənmə nişanlarının təsvirinin və daşınması qaydasının təsdiq edilməsi haqqında qərar qəbul edib.

"Operativ Məlumat Mərkəzi-OMM" xəbər verir ki, qərarı Baş nazir Əli Əsədov imzalayıb.

Hökumət başçısı həmçinin “Dəmiryol nəqliyyatı vasitələrini idarə etmək hüququnun verilməsi üçün ixtisas imtahanının təşkili və keçirilməsi Qaydası”nın təsdiq edilməsi haqqında qərara imza atıb. Qərara əsasən, ixtisas imtahanı aşağıdakı kateqoriyalar üzrə müəyyən edilmiş dəmiryol nəqliyyatı vasitələrinə münasibətdə keçirilir:

“Eq” - Elektrik qatarı;

“Dz” - Dizel qatarı;

“E” - Elektrovoz;

“T” - Teplovoz;

“Lm” - Lokomobil;

“M/Dr/Mk” - Motovoz/Drezin/Maşın kompleksi.

Prezident İlham Əliyev Əmək və Əhalinin Sosial Müdafiəsi Nazirliyi yanında İşsizlikdən Sığorta Fondunun (İSF) 2024-cü il büdcəsində dəyişiklik edilməsi qanunu təsdiqləyib.

"Operativ Məlumat Mərkəzi-OMM" xəbər verir ki, İSF-nin büdcə gəlirləri və xərcləri ilə bağlı proqnoz 238 milyon manat saxlanılıb, amma Fondun gəlirlərinin strukturu dəyişib.

Belə ki, işsizlikdən sığorta haqları ilə bağlı proqnoz 180 milyon manatdan 184,7 milyon manata, o cümlədən qeyri-büdcə sektorundan isşizlikdən sığorta daxilolmaları ilə bağlı proqnoz 134,6 milyon manatdan 139,3 milyon manata çatdırılıb, əvəzində Fondun istifadə olunmamış vəsaiti ilə bağlı proqnoz 57,95 milyon manatdan 53,25 milyon manata endirilib.

Prezident İlham Əliyev Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun (DSMF) 2024-cü il büdcəsində dəyişiklik edilməsi qanunu təsdiqləyib.

"Operativ Məlumat Mərkəzi-OMM" xəbər verir ki, DSMF-nin büdcə gəlirləri və xərcləri ilə bağlı proqnoz 6 919,9 milyon manatdan 6 949,9 milyon manata çatdırılıb.

Gəlirlərdəki artımı məcburi dövlət sosial sığorta haqları ilə bağlı proqnozun 5 288,1 milyon manatdan 5 478,1 milyon manata, o cümlədən qeyri-büdcə sektorundan sosial sığorta daxilolmaları ilə bağlı proqnozun 3 387,1 milyon manatdan 3 577,1 milyon manata çatdırılması, əvəzində isə Fondun büdcəsinin balanslaşdırılması məqsədilə dövlət büdcəsinin öhdəliklərinin maliyyələşdirilməsi üçün dövlət büdcəsindən ayrılan vəsaitin 1 392 milyon manatdan 1 232 milyon manata endirilməsi təmin edəcək.

Xərclərdəki artım isə əhaliyə ödənişlər üzrə xərclərin 6 681,6 milyon manatdan 6 706,6 milyon manata, o cümlədən əmək pensiyasının ödənilməsi xərclərinin 6 500 milyon manatdan 6 525 milyon manata, eləcə də Fondun aparatının və struktur bölmələrinin saxlanılması xərclərinin 130,1 milyon manatdan 135,1 milyon manata çatdırılması hesabına olacaq.