AFFA təyin edilən qaydaları pozan 3 klubu yarışlardan kənarlaşdırıb.
“Operativ Məlumat Mərkəzi-OMM” xəbər verir ki, bu barədə qərar qurumun İntizam Komitəsinin iclasında qəbul olunub.
AFFA U-12 Liqasında "Pambıqçı", U-11 Liqasında isə "Məhsul"la "Zəfər" klubları təyin edilən vaxtda meydanda olmadıqları üçün 0:3 hesablı texniki məğlubiyyətlə cəzalandırılıblar. Bu hal üçüncü dəfə təkrarlandığı üçün hər üç klub yarışlardan kənarlaşdırılıb.
Bundan əlavə, U-14 Liqasında keçirilməli olan "İnter" - "Qaradağ Lökbatan" oyunu "İnter" tərəfindən oyun protokolu və həkim təqdim edilmədiyinə görə baş tutmayıb. Nəticədə Bakı təmsilçisinə 0:3 hesablı texniki məğlubiyyət verilib.
AFFA Region Liqasında isə "Beyləqan" komandası "Şəfəq"lə oyuna çıxmadığına görə görüş baş tutmadığı üçün 0:3 hesablı texniki məğlubiyyətlə cəzalandırılıb.
