Prezident İlham Əliyev kənd təsərrüfatı sahəsində son illər müşahidə olunan durğunluğun narahatedici olduğunu bildirərək, problemin həlli istiqamətində yeni Dövlət Proqramının hazırlandığını və yaxın vaxtlarda qəbul ediləcəyini açıqlayıb. “Operativ Məlumat Mərkəzi-OMM” xəbər verir ki, dövlət başçısı bu barədə kənd təsərrüfatı məsələlərinə həsr olunmuş müşavirədə danışıb.
Prezident qeyd edib ki, əvvəllər qəbul edilmiş qərarlar və proqramlar sahədə ciddi dönüş yaradıb. Dövlət başçısı özəl sektorun bu prosesdəki rolunun vacibliyini vurğulayaraq bildirib:
- Özəl sektor nümayəndələri Dövlət Proqramının icrasında məsuliyyətli olmalı və ölkə iqtisadiyyatına sərmayə qoyuluşunu artırmalıdırlar.
- Sahibkarların kənd təsərrüfatına yatırımlarını stimullaşdırmaq üçün güzəştli kreditlər və digər dəstək mexanizmlərindən geniş istifadə olunacaq.
Prezident İlham Əliyev, həmçinin xarici investorların cəlb edilməsinin əhəmiyyətinə toxunub. Azərbaycanın beynəlxalq arenada yüksək nüfuza malik olduğunu və orta gücə malik dövlət kimi tanındığını vurğulayan dövlət başçısı, xarici şirkətlərin ölkə üçün prioritet sahələrə yönləndirilməsinin vacibliyini qeyd edib. Prezident əlavə edib ki, həm yerli, həm də xarici investorlar üçün qanun çərçivəsində bütün lazımi şərait yaradılır.
