30 illik işğaldan sonra azad edilən ərazilərin ümumi sahəsi 13 min 600 kvadratkilometr təşkil edir. Bu barədə Ağdam, Füzuli və Xocavənd rayonlarında Prezidentin xüsusi nümayəndəsi Emin Hüseynov Bakıda təşkil olunan Ümumdünya Şəhərsalma Forumunun 13-cü sessiyası (WUF13) çərçivəsində keçirilən tədbirdə çıxışı zamanı məlumat verib.
Emin Hüseynov qeyd edib ki, həmin ərazilərin 2 min 700 kvadratkilometri Füzuli, Xocavənd və Ağdam rayonlarının payına düşür və bu bölgələr azad edilmiş torpaqlar arasında ən sıx məskunlaşmış ərazilər hesab olunur.
Xüsusi nümayəndə Ağdam və Füzulinin Qarabağ və Şərqi Zəngəzur bölgəsində əhali sayı, ərazi və iqtisadi potensial baxımından ən böyük rayonlar olduğunu vurğulayıb:
- Bu şəhərlər işğal dövründə ən çox dağıntıya və vandalizmə məruz qalan yaşayış məntəqələri olub.
- Ağdam və Füzuli sanki heç vaxt mövcud olmayıbmış kimi tamamilə yerlə-yeksan edilib.
