Azərbaycanda kənd təsərrüfatı, balıqçılıq və akvakultura məhsullarının istehsalı, habelə emalı sahələrinin inkişafını hədəfləyən 2026-2030-cu illər üçün Dövlət Proqramı təsdiq edilib. Prezident İlham Əliyevin imzaladığı Sərəncama əsasən, qarşıdakı illərdə aqrar sektorun rəqabətqabiliyyətliliyinin artırılması üçün bir sıra mühüm tapşırıqlar müəyyənləşdirilib.
Sənədə əsasən, Nazirlər Kabineti aşağıdakı tədbirləri həyata keçirməlidir:
- Üç ay müddətində Kənd Təsərrüfatı Nazirliyinin təklifləri əsasında sahə üzrə normativ hüquqi bazanın təkmilləşdirilməsi;
- Altı ay müddətində buğda, pambıq və heyvandarlıq təsərrüfatlarının yaradılması planlaşdırılan ərazilərdə torpaqların kateqoriya və ya təyinatının dəyişdirilməsi ilə bağlı mexanizmlərin hazırlanması;
- Dövlət Proqramının icrası barədə ildə bir dəfə ölkə başçısına hesabat verilməsi.
Digər qurumların vəzifələri:
- Kənd Təsərrüfatı Nazirliyi: Üç ay ərzində müvafiq təsərrüfatların yaradılacağı ərazi vahidlərinin siyahısını təsdiq etməlidir.
- İqtisadiyyat Nazirliyi: "Azərbaycan Biznesinin İnkişafı Fondu" vasitəsilə kredit faizlərinin subsidiyalaşdırılması və investisiya layihələrinin dəstəklənməsi ilə bağlı təkliflərini üç ay ərzində təqdim etməlidir. Həmçinin, 2027-ci ildən başlayaraq 5 il müddətində müasir texnologiyalı təsərrüfatların kredit faizlərinin subsidiyalaşdırılması təmin ediləcək.
- Azərbaycan Qida Təhlükəsizliyi Agentliyi: Dövlət büdcəsi hesabına ölkədəki bütün iribuynuzlu və xırdabuynuzlu heyvanların birdəfəlik identifikasiyasını aparmalı, məlumatları müvafiq informasiya sistemlərinə inteqrasiya etməlidir.
- Azərbaycan Dövlət Su Ehtiyatları Agentliyi: Təsərrüfatların su təminatının yaxşılaşdırılması üçün zəruri addımlar atmalıdır.
Dövlət Proqramının monitorinqi və qiymətləndirilməsi İqtisadi İslahatların Təhlili və Kommunikasiya Mərkəzi tərəfindən həyata keçiriləcək. Maliyyə və İqtisadiyyat nazirlikləri isə Kənd Təsərrüfatı Nazirliyi ilə birlikdə proqramın icrası üçün dövlət büdcəsində və investisiya proqramlarında müvafiq vəsaitlərin ayrılmasını təmin etməlidirlər.
