ABŞ prezidenti Donald Trampa qarşı sui-qəsd cəhdi zamanı ənənəvi müxbirlər şam yeməyinin keçirildiyi salonda olan jurnalist Diaz-Balart hadisənin təfərrüatlarını bölüşüb.
"Operativ Məlumat Mərkəzi-OMM" xəbər verir ki, atışma təhlükəsizlik qüvvələri ilə 31 yaşlı kaliforniyalı Koul Allen arasında, 1981-ci ildə Ronald Reyqana da sui-qəsdin edildiyi "Hilton" otelində baş verib.
Təxminən 15 ildir bu tədbirə qatılan jurnalist bu il girişdəki təhlükəsizlik tədbirlərinin əvvəlki illərə nisbətən daha zəif olduğunu vurğulayıb.
Onun sözlərinə görə, külək və yağış səbəbindən yaranan qarışıqlıqda bəzi şəxslər sadəcə zərf göstərərək içəri daxil ola biliblər. Həmçinin, metal detektorlarının birbaşa Məxfi Xidmət tərəfindən idarə olunmadığı diqqət çəkib. Şübhəli şəxsin oteldə qalması isə onun hərəkətini daha da asanlaşdırıb.
Hadisə anında salondakılar silah səslərini çox net eşidiblər. "Beş dəfə atəş açıldı. Bunun güllə səsi olduğunu dərhal anladım", - deyə El Salvadordakı vətəndaş müharibəsində işləmiş müxbir bildirib. O, masanın altına gizlənmədiyini, əksinə, başını aşağı əyərək ətrafı müşahidə etdiyini qeyd edib.
Atışmadan dərhal sonra Nümayəndələr Palatasının sədri sürətlə təxliyə edilib. İlkin olaraq prezidentin tədbiri davam etdirmək istədiyi bildirilsə də, təhlükəsizlik xidmətinin qərarı ilə proqram tamamilə ləğv olunub.
