Ermənistan məhkəməsi bloger Artak Avetisyanın Baş nazir Nikol Paşinyana qarşı səsləndirdiyi “xain” ifadəsi ilə bağlı işin hüquqi təsnifatında dəyişiklik edib. Bu barədə məlumatı blogerin vəkili Ruben Melikyan özünün feysbuk səhifəsində paylaşıb.
Vəkilin bildirdiyinə görə, əvvəlcə “nifrət nitqi” kimi qiymətləndirilən paylaşım hazırda xuliqanlıq maddəsi ilə dəyərləndirilir. Ruben Melikyan qeyd edib ki, Ermənistan Kassasiya Məhkəməsinin mövcud təcrübəsinə əsasən, xuliqanlıq maddəsi adətən şəxsi münasibətlərdən irəli gələn hallara tətbiq edilir. Onun sözlərinə görə, siyasi bəyanatların bu maddə ilə ittiham edilməsi əvvəlki hüquqi yanaşmalarla ziddiyyət təşkil edir və gələcəkdə siyasi çıxışların xuliqanlıq kimi qiymətləndirilməsi təhlükəsini yaradır.
Xatırladaq ki, Artak Avetisyan Baş nazir Nikol Paşinyanı “xain” adlandırdıqdan sonra saxlanılıb. Hadisə mayın 12-də Paşinyanın Yerevanın Şenqavit rayonunda seçki kampaniyası keçirdiyi zaman baş verib. Məhkəmə mayın 15-də bloger barəsində bir aylıq həbs qətimkan tədbiri seçib.
