"Mundo Deportivo" nəşrinin məlumatına görə, "Əl-Hilal" klubu Joau Kanselunun daimi transferi üçün əvvəllər tələb etdiyi 15 milyon avroluq məbləğdən imtina edib. Səudiyyə təmsilçisi futbolçunun keçidi ilə bağlı mövqeyini dəyişərək kompromisə getməyə qərar verib.
Hazırda tərəflər arasında danışıqlar tanınmış agent Jorje Mendeşin vasitəçiliyi ilə davam etdirilir. Yeni təzminat məbləği barədə məlumat hələlik açıqlanmayıb. "Əl-Hilal" rəhbərliyi Kanselunun Səudiyyə Ərəbistanına qayıtmaqda maraqlı olmadığını, həmçinin baş məşqçi Simone İndzagi ilə münasibətlərinin gərginliyi səbəbindən komandadan ayrılmasının qaçılmaz olduğunu nəzərə alır.
"Barselona" isə transfer prosesini sürətləndirmək üçün yarımmüdafiəçi Mark Kasadonu mübadilə variantı kimi nəzərdən keçirir. Baş məşqçi Hansi Flikin planlarına daxil olmayan gənc oyunçunun "Əl-Hilal" üçün cəlbedici ola biləcəyi ehtimal edilir. Xatırladaq ki, ötən mövsüm icarə əsasında "Barselona"da çıxış edən Kanselu 23 matçda 2 qol və 4 məhsuldar ötürmə ilə yadda qalıb.
