Bakı-Tbilisi istiqamətində səfər edən sərnişinlərin qatara minməsi üçün biletlə yanaşı, bir sıra vacib sənədləri də təqdim etmələri tələb olunur. "Azərbaycan Dəmir Yolları" QSC-dən (ADY) verilən məlumata görə, səyahət zamanı aşağıdakı sənədlərin olması mütləqdir:
- Ümumvətəndaş pasportunun əsli: Qeyd edək ki, "mygov" platformasından əldə edilən rəqəmsal versiyalar keçərli sayılmır.
- Sağlamlıq sığortası: Gürcüstan tərəfinin tələblərinə uyğun olaraq sığorta sənədi mütləqdir.
- Uşaqlarla səyahət qaydaları: 5 yaşadək uşaqlar üçün onların adına rəsmiləşdirilmiş pulsuz bilet təqdim olunmalıdır.
- Notarial etibarnamə: Bir valideynlə səfər edən uşaqlar üçün digər valideynin, valideyn müşayiəti olmadan səyahət edən uşaqlar üçün isə hər iki valideynin notarial qaydada təsdiqlənmiş etibarnaməsi tələb olunur.
ADY-dən sərnişinlərə qatara rahat və sürətli keçid üçün bu sənədləri əvvəlcədən hazırlamaları tövsiyə edilib. Xatırladaq ki, Bakı-Tbilisi qatarı ilk səfərini saat 23:10-da həyata keçirir.
