Naxçıvan Muxtar Respublikasının Mədəniyyət Nazirliyi tabeliyində fəaliyyət göstərən uşaq musiqi və incəsənət məktəblərində təhsil alan şagirdlər üçün yeni imtahan qaydaları təsdiqlənib. 2025/2026-cı tədris ilindən etibarən buraxılış imtahanlarının mərkəzləşdirilmiş qaydada təşkili nəzərdə tutulur.
Proses Azərbaycan Respublikası Mədəniyyət Nazirliyinin rəqəmsal idarəetmə platforması və "MyCulture" vahid şəxsi kabineti vasitəsilə həyata keçiriləcək. İmtahanla bağlı bütün zəruri məlumatlar – tarix, vaxt və məkan barədə bildirişlər şagirdlərə SMS, elektron poçt və şəxsi kabinetləri vasitəsilə çatdırılacaq.
İmtahanların 2026-cı ilin iyun ayında keçirilməsi planlaşdırılır. Qiymətləndirmə prosesi ilə bağlı əsas məqamlar aşağıdakılardır:
- İmtahanlar müvafiq ixtisas komissiyaları tərəfindən aparılacaq.
- Qiymətləndirmə 5 ballıq sistem əsasında həyata keçiriləcək.
- Yekun nəticə komissiya üzvlərinin verdiyi balların orta göstəricisinə əsasən müəyyən olunacaq.
Tətbiq edilən bu yeniliklər uşaq musiqi və incəsənət təhsilində qiymətləndirmə sisteminin müasir standartlara uyğunlaşdırılması, şəffaflığın təmin edilməsi və təhsilin keyfiyyətinin artırılması məqsədi daşıyır.
