Rusiya Xarici İşlər Nazirliyinin sözçüsü Mariya Zaxarova Qərbin inkişaf etməkdə olan dövlətlərdən təbii ehtiyatları əldə etmək üçün İT texnologiyalarının transferi mexanizmini bir alətə çevirə biləcəyini bəyan edib. "Operativ Məlumat Mərkəzi-OMM"-in məlumatına görə, diplomat bu fikirləri Beynəlxalq Təhlükəsizlik Forumundakı çıxışı zamanı səsləndirib.
Zaxarova bildirib ki, İT həlləri xeyriyyəçilik pərdəsi altında inkişaf etməkdə olan ölkələrə təqdim olunur, lakin bunun müqabilində bağlanan resurs müqavilələri ağır və asılılıq yaradan şərtləri özündə ehtiva edir. Onun sözlərinə görə, bu proses həmin ölkələrin İT sektorunda Qərbdən asılılığını gücləndirir və nəticədə onlar öz təbii sərvətlərindən imtina etmək məcburiyyətində qalırlar.
Qeyd edək ki, sözügedən forum 26–29 may tarixlərində Rusiya Təhlükəsizlik Şurasının himayəsi ilə Moskva vilayətində təşkil olunur.
