Energetika naziri Pərviz Şahbazov “İstanbul Təbii Sərvətlər Zirvəsi”ndə iştirakı çərçivəsində Türkiyənin energetika və təbii sərvətlər naziri Alparslan Bayraktar və Moldovanın energetika naziri Dorin Junqietu ilə bir sıra görüşlər keçirib.
Energetika Nazirliyindən verilən məlumata görə, Türkiyəli həmkarı Alparslan Bayraktarla keçirilən görüşdə iki ölkə arasında strateji enerji tərəfdaşlığının yeni layihələrlə inkişafı yüksək qiymətləndirilib. Tərəflər Bakı-Tbilisi-Ceyhan və TANAP kimi layihələrin enerji təhlükəsizliyindəki roluna diqqət çəkərək, bu əməkdaşlığın elektrik enerjisi sektorunda da genişləndirilməsinin vacibliyini vurğulayıblar.
Müzakirələrin əsas mövzularından biri elektrik enerjisinin ixrac marşrutları olub:
- Azərbaycandan Naxçıvan və Gürcüstan üzərindən ötürülmə;
- Zəngəzur dəhlizi vasitəsilə Mərkəzi Asiyadan Türkiyəyə və Avropaya nəql imkanları.
Görüşdə həmçinin binalarda enerji səmərəliliyi üzrə texniki əməkdaşlıq haqqında imzalanmış Anlaşma Memorandumu əlaqələrin genişlənməsinin göstəricisi kimi qeyd edilib. Alparslan Bayraktar “Bakı Enerji Həftəsi”ndə iştirak edəcəyini təsdiqləyib.
Moldovanın energetika naziri Dorin Junqietu ilə keçirilən görüşdə isə qaz təchizatının sabitliyində boru kəmərlərinin rolu və enerji sahəsində islahatlar müzakirə edilib. Moldovalı nazir də “Bakı Enerji Həftəsi”nə qatılacağını bildirib.
