Milli Hidrometeorologiya Xidmətinin məlumatına görə, Bakı, Abşeron yarımadası və bəzi bölgələrdə müşahidə olunacaq küləkli hava şəraiti ilə əlaqədar sarı və narıncı xəbərdarlıq elan edilib. Baş Dövlət Yol Polisi İdarəsi (BDYPİ) yollarda yarana biləcək təhlükələrin qarşısını almaq məqsədilə sürücü və piyadalara müraciət ünvanlayıb.
Müraciətdə xüsusilə yük avtomobillərinin sürücülərinə və sahiblərinə ciddi xəbərdarlıq edilib:
- Qoşqulu, tentli və uzunölçülü yük avtomobillərinin sürücüləri küləkli havada hərəkətin təhlükəli olduğunu nəzərə almalı, yükün qablaşdırılmasına xüsusi diqqət yetirməlidirlər.
- Nəqliyyat vasitələrini aşma və ya sürüşmə ehtimalı olan obyektlərin yaxınlığında saxlamaqdan çəkinmək, parklanma üçün qapalı məkanlara üstünlük vermək tövsiyə olunur.
Yol polisi piyadaları da mövcud hava şəraitini nəzərə almağa və özlərinin, eləcə də digər hərəkət iştirakçılarının təhlükəsizliyini təhdid edə biləcək davranışlardan qaçmağa dəvət edib.
